57. GYLFI ÞÓR ÍÞRÓTTAMAÐUR ÁRSINS

 

Gylfi Þór Sigurðsson leikmaður Tottenham er íþróttamaður ársins á Íslandi árið 2013 og það er frábært. Hann er fyllilega að þeim titli kominn. Sjálfur, ef ég hefði haft atkvæðarétt, hefði ég reyndar valið Anítu Hinriksdóttur en Gylfi á þetta fullkomlega skilið. En það er voðalega leiðinlegt að heyra fólk, strax í kjölfar kjörsins, vera að hrauna yfir val íþróttafréttamanna og tjá sig um það á neikvæðan hátt í kommentakerfum netmiðlanna. Gylfi sjálfur, sem persónulega hefur ekkert með valið á sér að gera, fær jafnvel sinn skammt af fúkyrðunum og sumir hamast við að gera sem minnst úr honum. Þó að fólk sé ekki sammála um val fréttamannanna á kjörinu er engin ástæða til að hrauna yfir Gylfa. Nær væri frekar að gleðjast fyrir hans hönd og óska honum innilega til hamingju með titilinn. Það ætlum við allavega að gera hér á BOLTABULLI.

 

En við höfum einnig tekið þá ákvörðun, eins og oft er venja hjá knattspyrnunetmiðlum (sem við hljótum að teljast), að velja knattspyrnumann ársins 2013.

 

OG HÉR MEÐ ER ÞAÐ GERT OPINBERT AÐ ANÍTA HINRIKSDÓTTIR HEFUR VERIÐ KJÖRIN KNATTSPYRNUMAÐUR ÁRSINS HJÁ FÓTBOLTANETMIÐLINUM BOLTABULL.BLOGSPOT.COM.
 



56. SPEKINGAR SPÁ Í ENSKA BOLTANN

Og þá er komið að enska boltanum þar sem sérfræðingar BOLTABULLS ætla enn og aftur að tjá sig á vitrænan hátt um leiki helgarinnar. Um síðustu helgi var Garðar nokkuð örugglega efstur og fékk 11 stig úr leikjunum 6, Tumi fékk 8 stig og Helgi fékk 7. Tumi hefur því 112 stig á toppnum, Garðar er nú kominn með 97 og Helgi hefur dregist heldur aftur úr og hefur 91 stig.

 

En hér koma næstu spár spekinganna:

 

NORWICH - MAN UTD

Tumi: 0-2
Helgi: 1-4 Rooney með tvö, aðrir færri.
Garðar: 0-2 Norwich er ekki að fara að vinna muu.

 

MAN CITY - CRYSTAL PALACE
Tumi: 4-0
Helgi: 7-0 city svarar fyrir sig eftir tapið gegn Liverpool.
Garðar: 4-0 Kristalshöllin mölbrotnar gegn bláberjunum.

 

NEWCASTLE - ARSENAL
Tumi: 0-2
Helgi: 1-2 Hikstandi fallbyssur.
Garðar: 1-3 Wenger festist í svefnpokanum og kemst ekki út í seinni hálfleikinn.

 

EVERTON - SOUTHAMPTON
Tumi: 1-2
Helgi: 1-0 Mirallas skorar sigurmarkið eftir að hann hefði átt að fá rautt spjald.
Garðar: 2-1 Þessi lið eru bara svo rosalega mikið á sama rólinu.
 

CHELSEA - LIVERPOOL
Tumi: 1-1
Helgi: 1-2 Suarez með tvö.
Garðar: 2-1 Liverpool vann deildina áttatíu og eittthvað og fer ekki að vinna Chelsea neitt.

 

TOTTENHAM - STOKE
Tumi: 2-0
Helgi: 1-0 Soldado getur bara ekki hætt að skora.
Garðar: 2-1 Þarf ekki að ræða þetta neitt. Spurs ósigrað í deildinni eftir að Sherwood tók við.

55. GLEÐILEG JÓL!

54. ENN EIN STJÓRASKIPTIN

Tottenham Hotspur er liðið mitt, eins og auðvitað allir vita, og með þeim hef ég haldið síðan keppnistímabilið 1979-80. Þá um haustið áskotnaðist mér eitthvert nammi (pantað upp úr breskum póstlista) þar sem fylgdi með pakki af fótboltamyndum og á einni af þessum myndum var Steve nokkur Archibald, skoskur landsliðsmaður, sem þá var nýgenginn í raðir Tottenham en kappinn var reyndar í búningi Aberdeen á myndinni. Á þessum örlagaríka tímapunkti tók ég þá gæfu- og giftusamlegu ákvörðun að byrja að halda með Spurs. En það er aftur á móti önnur saga.

 

Gott samt ef þetta er hreinlega ekki bara myndin?

 

 

Þetta var sem sagt líklega haustið 1979 og síðan eru liðin rúmlega 34 ár! Líklega var ég í fyrstu ekkert sérstaklega dyggur stuðningsmaður, enda aðeins tíu ára gamall, en lagði það þó á mig að læra nöfnin á helstu hetjum liðsins og fylgdist á hverjum laugardegi með Bjarna Fel tíunda úrslit dagsins í lok Ensku knattspyrnunnar. Steve Archibald og Ricardo Villa voru í uppáhaldi og svo vissi ég auðvitað að "managerinn" hét Keith Burkinshaw. Stundum gekk liðinu vel og stundum ekki. Við bræðurnir fórum fljótlega að versla fótboltablöðin Match og Shoot og ef stórar myndir eða plaggöt af leikmönnum Tottenham eða Liverpool (bróðir minn hélt með þeim sko) voru í blöðunum, deildum við þeim samviskusamlega á milli okkar.

Keith Burkinshaw var fyrsti stjórinn sem ég man eftir og hann gerði frábæra hluti fyrir Spurs. Auk þess að vinna Bikarinn (1981 og 1982), Evrópukeppni bikarhafa (1984) og Góðgerðarskjöldinn (1981) þá tapaði liðið einnig úrslitaleik Mjólkurbikarsins (1982) og einum leik um Góðgerðarskjöldinn (1982). Burkinshaw náði að koma liðinu hæst í þriðja sæti deildarinnar og tvisvar í það fjórða en nær komst Tottenham ekki til að gera atlögu að enska deildartitlinum í hans tíð. Ekki má heldur gleyma þeirri frumkvöðlavinnu sem Spurs stóð fyrir í tíð Burkinshaw en liðið fékk tvo af leikmönnum Argentínska landsliðsins (sem urðu heimsmeistarar árið 1978) til Englands. Þetta voru fyrstu "alvöru" útlendingarnir til að spila í ensku deildinni.

Hér má sjá þá Keith Burkinshaw og Peter Shreeves með gamla góða Evrópubikarinn sem Spurs vann vorið 1984 en Shreeves tók við af Burkinshaw sumarið 1984.

Annars er best að rifja aðeins upp þá knattspyrnustjóra Tottenham sem hafa verið við stjórnvölinn frá því ég hóf að halda með liðinu árið 1979. Þetta er sorglega stór hópur.
 

Þessi mynd segir þó ekki nærri því allan sannleikann því að þónokkrir bráðabirgðastjórar hafa einnig komið við sögu félagsins á þessum tíma og eru ekki taldir upp með þessum hóp. Þeir Trevor Hartley og Doug Livermore sáu um liðið, til bráðabirgða í nokkrar vikur, eftir að David Pleat hætti haustið 1987. Steve Perryman stjórnaði liðinu fáeina leiki eftir að Ossie Ardiles var rekinn í október 1994 og áður en Gerry Francis tók við en svo þegar Francis hætti þremur árum seinna sá Chris Hughton um liðið í nokkra daga áður en svisslendingurinn Christian Gross tók við. Gross entist heilan meðgöngutíma áður en David Pleat tók við liðinu eitt augnablik á meðan verið var að ráða erkióvininn George Graham. Hann (Pleat) tók svo aftur við eftir að Graham var rekinn og áður en Glenn Hoddle var ráðinn! Enn tók Pleat við til bráðabirgða þegar Hoddle hætti en síðan var Frakkinn Santini ráðinn en hætti eftir nokkrar vikur. Næst var komið að Clive Allen að sinna liðinu til bráðabirgða eftir að Martin Jol var rekinn 2007 og nú er það Tim Sherwood sem stjórnar liðinu tímabundið. Fljótt á litið sýnist mér þetta vera 22 stjórar í heildina á 34 árum en reyndar aðeins að því gefnu að mér hafi tekist að telja rétt. Þetta er auðvitað ALLTOF mikið!

Alveg frá því að Burkinshaw hætti hefur maður haft þá trú að komið sé að því að ráða mann sem geti byggt upp alvöru lið og nú hlýtur maður að gera þá kröfu að Spurs fái stjóra sem fær að vinna vinnuna sína í friði. Santini (hann hætti reyndar óvænt sjálfur ef ég man rétt), Jol, Ramos og Villas-Boas voru allt menn sem ég hafði trú á en þolinmæði stjórnarmannsins Daniel Levy virðist vera afskaplega takmörkuð. Þarna eru líklega einungis peningasjónarmið sem gilda.

Það virðist þó litlu máli skipta hvaða nafn verður nefnt í tengslum við nýjan stjóra. Miðað við reynslu Tottenham aðdáenda og þolinmæði stjórnarmannsins þá má ganga að því vísu að sá nýji fái 1-3 tímabil áður en hann verður rekinn. Sjálfur hef ég ákveðnar skoðanir eða hugmyndir á því hvaða menn ætti að ræða við en miðað við fyrri reynslur er alveg eins gott að ráða Mikka mús í starfið.

ÁFRAM TOTTENHAM!


53. SPEKINGAR SPÁ Í ENSKA BOLTANN

 

Þá er komið að síðustu umferð ensku Úrvalsdeildarinnar fyrir jól og venju samkvæmt ætla sérfræðingar síðunnar að velta aðeins fyrir sér 6 áhugaverðustu leikjunum og spá fyrir um líkleg úrslit þeirra. Um síðustu helgi varð Tumi efstur og náði sér í 8 stig, Garðar fékk 7 og Helgi 6. Tumi er því enn með gott forskot á toppnum og er nú kominn yfir hundrað stiga múrinn. Hann er því með 104 stig, Garðar hefur 86 og Helgi er með 84.

 

En hér eru sem sagt leikir helgarinnar:

 

LIVERPOOL - CARDIFF

Tumi: 3-0

Helgi: 6-0 - Annað hvort vinnur Liverpool 6-0 eða tapar 0-2 fyrir stjóralausu Cardiff-liði, ég hallast að því fyrrnefnda og Suarez skorar eitthvað á bilinu 2-5 mörk.

Garðar: 3-0 Held að þetta Cardiff lið sé engan veginn að fara að fá stig á útivelli í þessum fallbaráttuleik.

 

FULHAM - MAN CITY

Tumi: 0-3

Helgi: 0-4 Það skiptir engu þó Aguero sé meiddur, Dzeko 2, Milner 1, Negreto 1.

Garðar: 1-4 Þeir bláklæddu fara ekki að tapa fyrir Fúlverjum. Berbapabbi skorar úr víti fyrir heimamenn.

 

MAN UTD - WEST HAM

Tumi: 2-1

Helgi: 1-0 Ashole Young lætur sig detta í teignum og Hirohito Chiquita skorar úr vítinu.

Garðar: 2-1 Hef enga trú á þessu muu liði en verð að spá skynsamlega til að eiga séns á að ná Tuma.

 

SOUTHAMPTON - TOTTENHAM

Tumi: 0-2

Helgi: 2-1 Tottenham hefur engan kút til að rétta sig úr og tapar með glæsibrag, Dalai Lama skorar bæði mörkin fyrir The Simons Templars.

Garðar: 1-2 Andskotinn hafi það!

 

SWANSEA - EVERTON

Tumi: 1-3

Helgi: 1-3 Mirallas, Baines og LeFolie skora fyrir strumpana en Michuuuu... (guð hjálpi þér!) fyrir álftirnar.

Garðar: 1-2 Desmond Tutu og Nelson Mandela skora ekki mikið í þessum leik.

 

ARSENAL - CHELSEA

Tumi: 2-1

Helgi: 1-1 Borðleggjandi jafntefli, Charlie Nicholas skorar fyrir Arsenal og Kerry Dixon jafnar fyrir Chelsea.

Garðar: 1-1 Þetta er dauðadæmt og steindautt 1-1 leikur.

52. ÍSLENDINGAR HJÁ GLASGOW CELTIC

Í gamla daga (ok. þegar ég var ungur) voru ekki margir íslenskir knattspyrnumenn sem fengu tækifæri til að leggja land undir fót og gera uppáhalds íþróttina sína að atvinnu sinni en þeir fáu sem gafst kostur á því voru miklar hetjur í augum okkar guttanna. Helstu stjörnur landsliðs þeirra ára spiluðu í Hollandi, Belgíu og Vestur Þýskalandi en þeir sem spiluðu á Norðurlöndunum þóttu ekki jafn merkilegir. Ásgeir Sigurvinsson var auðvitað stærsta hetjan og sá leikmaður sem reið á vaðið á þessum tíma en áður höfðu Albert Guðmundsson og Þórólfur Beck verið þeir helstu sem eitthvað komust í kynni við atvinnumennsku.

 

Íslendingar hafa verið duglegir að undanförnu að framleiða góða knattspyrnumenn, sem hafa varla undan við að skrifa undir samninga við erlend félög, en nú virðast heilu kynslóðirnar af efnilegum leikmönnum vera að ryðjast fram á sjónarsviðið. Knattspyrnuhallirnar sem risu í byrjun aldarinnar eru augljóslega farnar að skila gæðaafurðum og framleiðslan fer ekki lengur bara á bragðdaufan norrænan markað heldur eru margir ungir leikmenn að spila í mörgum af sterkustu deildum Evrópu.

Í það minnsta eru íslensku yngri landsliðin gríðarlega efnileg um þessar mundir og allir vita líka hve A landsliðið stóð sig vel í undankeppninni fyrir HM 2014. Framtíðin virðist því vera mjög björt í íslenskri knattspyrnu og vonandi er ekki langt að bíða þess að landsliðið komist á lokamót HM eða EM.

Einn af þeim ungu leikmönnum sem hafa verið að koma upp að undanförnu er Framarinn Hólmbert Friðjónsson en eins og allir vita gerði hann í haust samning við skoska félagið Glasgow Celtic. Það er gaman að sjá þegar ungur íslenskur leikmaður fær tækifæri til að koma sér á framfæri á einhverjum öðrum vettvangi en Norðurlöndunum og þó að skoski boltinn sé kannski ekki sá hæst skrifaðasti í Evrópu, þá er mjög skemmtileg stemmning og aldargömul hefð í kringum hann. Celtic er til dæmis fastur gestur í Meistaradeildinni og það verður eflaust gaman að sjá hvort Hólmbert fái tækifæri til að spila með aðalliði félagsins.

En Hólmbert er ekki fyrsti Íslendingurinn til að spila með skoska stórveldinu Glasgow Celtic. Jóhannes Eðvaldsson, Búbbi, lék um fimm ára skeið með félaginu og spilaði með þeim 127 leiki þar sem hann skoraði 24 mörk.

Búbbi hóf feril sinn með Val hér á landi í lok sjöunda áratugar síðustu aldar og lék með þeim áður en hann hellti sér út í alvöru atvinnumennsku. Celtic hafði fylgst með honum um nokkurt skeið og boðið honum til æfinga auk þess sem hann spilaði nokkra leiki með liðinu áður en hann gerði 5 ára samning við félagið í ágúst 1975. Lið Celtic var á þessum árum eitt það sterkasta á Bretlandseyjum og vann til dæmis skosku deildina níu sinnum í röð frá árunum 1966 til 1974. Búbbi vann deildina tvisvar með Celtic og einnig tvisvar sinnum bikarinn en þess má geta að Kenny Dalglish var leikmaður liðsins þegar Búbbi gekk til liðs við það. Dalglish var síðan seinna seldur til Liverpool og spilaði með þeim í mörg ár.

Það var einmitt skemmtileg tilviljun að einn af fyrstu leikjum Búbba með Celtic var gegn fyrrum félögum sínum í Val í Evrópukeppni bikarhafa í september sama ár. Hann sló reyndar ekki í gegn, í leik liðanna á Laugardalsvellinum, þar sem hann brenndi af tveimur vítaspyrnum gegn gömlu félögunum en Celtic vann þó reyndar leikinn með tveimur mörkum gegn engu. Í tilefni Íslandsheimsóknarinnar var Búbbi fyrirliði Glasgow Celtic í leiknum.

Hér fyrir neðan má sjá þá Kenny Dalglish og Magnús Bergs berjast um boltann á Laugardalsvellinum en þessa sömu leikmenn má einnig sjá kljást, í landsleik Skotlands og Íslands tíu árum seinna, efst á Boltabulls hausnum hér fyrir ofan á síðunni.

Í seinni leiknum skoraði Búbbi hins vegar fyrsta markið í leiknum sem endaði með stórsigri skosku bikarmeistaranna 7-0.

Búbbi stóð sig vel í skoska boltanum og lék með félaginu í fimm ár, eins og áður sagði, en leitaði síðan á önnur mið og spilaði seinna í Bandaríkjunum og Vestur Þýskalandi. Hann lauk síðan atvinnumannaferli sínum í Skotlandi þar sem hann spilaði í tvö ár með úrvalsdeildarliðinu Motherwell.

Það er vonandi að Hólmbert Friðjónsson fái tækifæri til að feta í fótspor Búbba og spila mikið af leikjum með skoska félaginu.

51. SPEKINGAR SPÁ Í ENSKA BOLTANN

Sérfræðingar Boltabullsins voru ekkert að fórna of mörgum stigum í síðustu umferð og fengu allir fjögur stig fyrir afrakstur sinn. Enn er Tumalíus efstur og er nú með 96 stig, Garðar hefur 79 og Helgi er nú með 78 stig.

En svona lítur næsta umferð út:

MAN CITY - ARSENAL
Tumi: 1-2 Giroud með tvö fyrir Arsenal og Agüero skorar fyrir City.
Helgi: 3-1 Sittí heldur áfram að skora, lið sem vinnur BM hlýtur að vinna Ars.
Garðar: 2-1 Þeir ljósbláu eru með besta liðið í Úrvalsdeildinni eins og er.

EVERTON - FULHAM
Tumi: 2-0 Lukaku með bæði.
Helgi: 4-0 Synd að Moyes skuli ekki vera með evertúninga ennþá, en það er auðvitað fínt að hafa hann hjá júnæt.
Garðar: 2-1 Veit ekkert með þetta Efratúns lið en Berba skorar fyrir Fúlara.

NEWCASTLE - SOUTHAMPTON
Tumi: 1-1 Rickie Lambert skorar fyrir Newcastle og Loïc Rémy fyrir Southampton.
Helgi: 2-1 Dýrlingavitleysunni að linna, Kakóbæjó setur 'ann.
Garðar: 1-1 Hundleiðinlegt alveg.

CHELSEA - CRYSTAL PALACE
Tumi: 3-0 Oscar og Hazard með sitthvort en ég veit ekki með það seinasta.
Helgi: 5-0 Algjört lágmark.
Garðar: 4-0 Þetta tímabil er ein allsherjar kristrallsnótt fyrir útiliðið.

ASTON VILLA - MAN UTD
Tumi: 0-2 Rooney og Chicharito með mörkin.
Helgi:  1-2 Heppnisútisigur.
Garðar: 1-1 Moyes & félagar fara að rétta úr kútnum.

TOTTENHAM - LIVERPOOL
Tumi: 1-2 Sturrage og Suarez fyrir lifurpoll en Soldado fyrir Spurs.
Helgi: 1-4 Suarez klárar þetta.
Garðar: 2-1 Þetta er klárlega heimasigur.


50. SNJÓR Á WHITE HART LANE

Nú líður að þeim árstíma sem skemmtilegast er að fylgjast með og mest er um að vera á leikvöngum ensku Úrvalsdeildarinnar í knattspyrnu. Jólavertíðin er innan seilingar og hvað er þá betra en að njóta góðrar hvíldar yfir góðum fótboltaleik, heimatilbúinni hitaðri samloku úr Panini brauði, með Hamborgarhrygg, pepperoni, sætu frönsku sinnepi og bræddum osti og með Malt & Appelsíni í glasi á kantinum.

 

 

Einn er þó oft galli á gjöf Njarðar í kringum þessa eðalárstíð fótboltaáhugamannsins.  Desember og janúar eru auðvitað köldustu vetrarmánuðirnir á Bretlandseyjum og jafnvel hinir stærstu leikvangar ensku Úrvalsdeildarinnar fara ekki varhluta af veðravítum, ófærðum og snjóþyngslum. Áður fyrr voru frestanir á leikjum fastir liðir á þessum árstíma en í seinni tíð hafa snjór og kuldi ekki haft jafn mikil áhrif á leikvellina sjálfa. Nú gerist það helst að leikjum sé frestað vegna þess yfirvöld telja óráðlegt að stefna mannmergðinni út í ófærðina í umferðinni við að koma sér á völlinn.

Það er búið að vera kalt að undanförnu og ekki eru margar vikur síðan íslenskir knattspyrnuáhugamenn þurftu á allri sinni einbeitningu að halda við að fylgjast með veðurspám og líkur á snjóalögum í tengslum við umspilsleik Íslands og Króatíu á Laugardalsvellinum. Það slapp fyrir horn með fyrirbyggjandi aðgerðum en snjórinn tók að falla tveimur mínútum eftir leikslok.

 

Fyrir Tottenham aðdáendur og reyndar auðvitað alla knattspyrnuáhugamenn er gaman að rifja upp gamla tíma með White Hart Lane fullum af snjó.

 

Veturinn 1948 þurftu vallarstarfsmenn á WHL heldur betur að draga fram skóflurnar sínar til að moka snjó af vellinum. Ekki fylgir reyndar sögunni hvaða leikur stóð fyrir dyrum en af myndinni að dæma hefur verkefnið verið brýnt.

 

 

Í janúar árið 1963 átti Spurs heimaleik gegn Burnley í 3. umferð enska bikarsins og vallarstjórinn og menn hans unnu þrekvirki við að hreinsa snjóinn af vellinum. Þessi vetur var einmitt kunnur fyrir snjóþyngsli sín á Bretlandseyjum þótt ekki sé víst að íslenskir veðurbræður þeirra gæfu mikið fyrir þær fullyrðingar.

 

 

Þetta hefur þó líklega verið ansi hreint mikil vinna...

 

 

Tottenham og Everton áttu að mætast á WHL í lok nóvember 1969 en leiknum var frestað vegna snjókomu.

 

 

Augljóslega var ekkert vit í að spila við þessar aðstæður og leikurinn var því settur á þann 17. desember. Í það skiptið voru liðin ekki búin að spila nema í um 20 mínútur þegar flóðljósin á White Hart Lane biluðu og ekki gafst tækifæri til að klára leikinn fyrr en í mars árið 1970.

 

 

Man Utd kom í heimsókn á White Hart Lane 1979 og fyrir þann leik þurfti enn að moka af vellinum.

 

 

Og sama var upp á teningnum í janúar árið 2013 þegar Man U kom enn í heimsókn.

 

 

Það er alla vega ljóst að White Hart Lane ber nafn með rentu...

 

49. SPEKINGAR SPÁ Í ENSKA BOLTANN

 

Enn eina helgina rúllar enski boltinn á ný og sérfræðingar Boltabulls hafa setið sveittir undanfarna sólarhringa við að reikna út líklegustu úrslit leikjanna. Síðast fékk Garðar flest stig eða 10, Tumi var með 8 og Helgi fékk 6 stig. Tumi er því enn efstur og er alls kominn með 92 stig, Garðar er kominn upp fyrir Helga og hefur nú 75 en sá rekur nú lestina og er með 74 stig.

 

En hér koma spár helgarinnar:

 

MAN UTD - NEWCASTLE

Tumi: 1-2  Loïc Rémy með bæði.

Helgi: 2-0 Annars er ekkert hægt að treysta á þetta júnæted lið.

Garðar: 2-1 Moyes hlýtur luma á einhverju sniðugu í þynnkunni eftir Efratúns ævintýrið og tekur þann krullótta úr liðinu.

 

SOUTHAMPTON - MAN CITY

Tumi: 0-4 Aguero með 2, Negredo með 1 en ekki viss með það seinasta.

Helgi: 0-3 Ævintýrið úti á The Dell, Aguero (2) og Jæja Túre skora.

Garðar: 1-2 South hrapar niður töfluna og á ekki séns í bláa lónið.

 

STOKE - CHELSEA

Tumi: 0-3 Oscar með tvö og Lampard eitt.

Helgi: 0-2 Þægilegur blár sigur, Hazard og Mata með mörkin.

Garðar: 0-2 Auðveldur strumpasigur á útivelli.

 

LIVERPOOL - WEST HAM

Tumi: 3-0 Suarez með þrjú.

Helgi: 5-0 Og veislan heldur áfram, samt skorar Suarez bara þrjú.

Garðar: 2-1 Óvæntur heimasigur en hef enga trú á að hinn markagráðugi Shuwares skori í leiknum.

 

SUNDERLAND - TOTTENHAM

Tumi: 0-2 Við mamma erum sammála um það.

Helgi: 1-2 Botnslagur, Íslendingurinn frystur.

Garðar: 0-2 Mér er eiginlega sama hvernig þessi leikur fer, svo framarlega sem Spurs vinnur.

 

ARSENAL - EVERTON

Tumi: 3-0 Giroud með tvö og Özil eitt.

Helgi: 2-0 Özil skorar annan leikinn í röð og Giroud nær einu.

Garðar: 3-1 Everton er enn að fagna sigri á muu og gleymir alveg að vinna.

48. PONDUS GÆRDAGSINS

Við verðum eiginlega bara að leyfa kaldhæðnislegum Pondusi, úr Fréttablaði gærdagsins, að fá að njóta sín aðeins hér.

 



47. SPEKINGAR SPÁ Í ENSKA BOLTANN

Og þá er víst komið að leikjum umferðarinnar í enska boltanum en síðast fékk Tumi 6 stig, Helgi 3 og auðvitað var Garðar enn og aftur efstur með 8 stig. Tumi er enn efstur og hefur nú 84 stig, Helgi er með 68 en Garðar hefur 65.

 

Hér eru svo leikir helgarinnar:

 

CARDIFF - ARSENAL

Tumi: 0-3 Giroud skorar eitthvað.

Helgi: 1-4 Ég sé ekki að neitt lið sé að stoppa Ars þessa dagana, Giroud og Ramsey með tvö hvor.

Garðar: 0-2 Þoli auðvitað ekki þetta arsenik lið en Weilsverjarnir eru bara ekkert góðir.

 

TOTTENHAM - MAN UTD

Tumi: 1-1 Steindautt og leiðinlegt jafntefli.

Helgi: 0-2 Bara sorry Garðar en þetta lið þitt getur bara ekkert.

Garðar: 1-1 Er ekki bjartsýnn á góð úrslit um helgina en styð mína menn til hinsta dauðdaga. Held samt að Soldado skori ekki í dag.

 

HULL - LIVERPOOL

Tumi: 0-3 Ég vil bara ekkert segja um þennan leik.

Helgi: 0-3 Suares 2 og Coutinho 1.

Garðar: 0-2 Hull er arfaslakt fótboltalið en Liverpul eru bara arfar sem bíta

 

CHELSEA - SOUTHAMPTON

Tumi: 2-0 En mamma segir 3-0.

Helgi: 2-1 Sáþþemptingarnir krækja næstum því í stig á Brúnni.

Garðar: 2-1 Dýrlingarnir eru að gefa eftir og vinna ekki bardagann við bláfótunga.

 

MAN CITY - SWANSEA

Tumi: 4-0 Agueroooooooooooo!!!!

Helgi: 6-1 Stefnir í einhvers konar markamet hjá Sjittí.

Garðar: 3-0 City er sennilega besta lið deildarinnar (á eftir Spurs) og álftirnar eiga engan séns nema á stórtapi.

 

EVERTON - STOKE

Tumi: 3-1 Lukaku skorar 2.

Helgi: 1-0 Líklega með afbrigðum leiðinlegur leikur þar sem Distin skorar sigurmarkið með skalla í fyrri hálfleik.

Garðar: 1-0 Nenni ekki að skrifa neitt um þennan leik.

46. GEORGE BEST - 25. NÓVEMBER

Það er kominn 25. nóvember og það þýðir bara auðvitað það að í dag eru liðin 8 ár síðan að Norður Írski knattspyrnusnillingurinn George Best lést, 59 ára að aldri. Tilvalið að hafa mynd af kallinum í tilefni dagsins

 

Hér er hann, ásamt stórvini sínum Elton John, staddur á sínum velmektardögum í Ameríku þar sem hann spilaði til fjölda ára. Sir Elton átti hins vegar fótboltafélagið Watford en spilaði samt aldrei með þeim.

Svo er önnur mynd af þeim hér þar sem þeir virðast vera á leið á grímuball en á báðum myndunum eru þeir reyndar í búningum knattspyrnufélagsins Los Angeles Aztecs sem Elton John átti hlut í.

 

Annars er tilvalið að vitna aðeins í snillinginn Best og um leið benda á sjálfsævisögu hans, Lánsamur, sem kom út á íslensku fyrir nokkrum árum og er alveg stórskemmtileg lesning.

"Ég eyddi miklum peningum í áfengi, hraðskreiða bíla og fagrar konur en mest af aurunum mínum fór þó í eintóma vitleysu."

"Árið 1969 hætti ég að drekka áfengi og stunda kynlíf. Það voru verstu 20 mínúturnar í lífi mínu."



45. SPEKINGAR SPÁ Í ENSKA BOLTANN

 

Það voru víst engir leikir spilaðir í enska boltanum um síðustu helgi, líkt og glöggir aðdáendur Boltabulls hafa væntanlega tekið eftir, en þá var boðið upp á enn eina landsleikjahelgina sem menn eru einmitt svo afskaplega mishrifnir af. Að þessu sinni voru þó landsmenn allir svo yfirspenntir og límdir við skjáinn að áhorfendatölur komu meira að segja glöggt fram á mælum Orkuveitunnar!

Annars fengu þeir Tumi og Helgi sitt hvor 8 stigin úr leikjum umferðarinnar en Garðar var samt langefstur með 3 stig. Aukaleikirnir tveir gáfu Tuma 4 stig, Helga 3 og Garðari 1. Heildarstaðan hjá sérfræðingunum er því þannig að Tumi er enn efstur og er nú kominn með 78 stig, Helgi hefur 65 og Garðar nartar í hælana á þeim og er með 57 stig. Augljóslega er aðeins tímaspursmál hvenær hann tekur forystuna í leiknum.

En hér koma leikir helgarinnar;

EVERTON - LIVERPOOL
Tumi: 0-2 Sturridge og Suarez með mörkin.
Helgi: 1-1 Derbyjafntefli.
Garðar: 1-2 Pat Benatar og Buddy Holly með mörkin í derby leiknum.

ARSENAL - SOUTHAMPTON
Tumi: 3-1 Ramsey og Giroud skora fyrir Ars og Özil leggur upp en fyrir Southampton skorar Rickie Lambert.
Helgi: 2-2 Þreyta í landsliðsmönnum Arsenal.
Garðar: 1-0 Þetta er eiginlega soldið erfiður leikur. Ars eru efstir en geta samt ekkert og ég treysti ekki Dýrlingunum fyrir þessu. 

NEWCASTLE - NORWICH
Tumi: 3-0 Leiðinlegur leikur en Loïc Remy með þrennu bara.
Helgi: 3-0 Tiltölulega léttur röndóttur sigur.
Garðar: 2-0 Steindautt og hundleiðinleg bæði liðin.

WEST HAM - CHELSEA
Tumi: 0-3 Oscar og Eto'o alveg meðetta.
Helgi: 1-2 Lundúnskur útisigur.
Garðar: 0-2 Slæmur kafli hjá Abró & félögum en Edrú er kominn í gang.

MAN CITY - TOTTENHAM
Tumi: 2-1 Agüero skorar a.m.k. eitt.
Helgi: 1-1 Þriðja jafnteflið í þessu tippi.
Garðar: 1-0 Líklega best að vera svolítið svartsýnn í dag og enn skorar Soldado.

CARDIFF - MAN UTD
Tumi: 2-1 Ashley Old dýfir sér og fiskar víti sem Rooney skorar úr og Campell með tvennu.
Helgi: 1-2 Rooney með bæði.

Garðar: 1-2 Man jú tekur þetta og rétt sleppa við fall.

44. DON'T STOP ME NOW!

43. 90 MÍNÚTUR Í VIÐBÓT

Þá er víst kominn hálfleikur í umspilsviðureignum Íslands og Króatíu fyrir laust sæti á HM í Brasilíu í sumar og íslenska liðið getur sko alveg vel við unað með stöðuna. 0-0 eru frábær úrslit og þá sérstaklega með það í huga að Króatarnir léku manni fleiri stóran hluta leiksins en sérstaklega er mikilvægt að þeir náðu ekki að skora mark hjá okkur. Íslenska liðið stóð sig frábærlega miðað við aðstæður og stuðningurinn á vellinum var einstakur. Ég held ég hafi aldrei áður heyrt troðfullan Laugardalsvöllinn syngja áður allan þjóðsönginn. Venjulega heyrast bara örfáar hræður taka undir í lok söngsins þegar Ísland þúsund ár hljómar í einfaldasta hlutanum.
 

 

Nú er það eina, sem getur komið í veg fyrir að Ísland komist á HM, er að Króatía vinni heimaleik sinn. Hmmmmm... og það er reyndar töluverðar líkur. En ef staðan er 0-0 eftir venjulega leiktíma í seinni leiknum í Króatíu, þá er Ísland enn inni og þá verður gripið til framlengingar en önnur jafntefli (með mörkum) tryggja það að Strákarnir okkar komast á HM. Hvert einasta mark sem Ísland skorar í seinni leiknum getur orðið dýrmætt því að þá þurfa Króatarnir alltaf að skora einu meira.

Þá er gaman að velta sér aðeins upp úr þeim vangaveltum, sem í gangi voru fyrir umspilið, um gegn hvaða þjóð væri heppilegast að lenda með tilliti til möguleika á að komast á HM. Flestir voru á þeirri skoðun að Íslendingar ættu skárstu möguleikana gegn Grikkjum og einhverjir nefndu einnig Úkraínu sem heppilegan mótherja. Báðar þessar þjóðir unnu hins vegar sína fyrri leiki í umspilinu nokkuð örugglega á heimavelli. Grikkland sigraði Rúmeníu 3-1 á meðan Úkraína vann Frakkland 2-0. Menn voru almennt sáttir við að mæta Króatíu og fegnir að þurfa ekki að mæta Portúgölum en hins vegar er spurning hvort ekki hefði bara verið hentugast að spila við Frakka ef það hefði verið í boði? En eins og staðan er núna í einvíginu getur Ísland vel við unað.
 

 

Fyrirfram hefur verið talað um umspilsleikina sem stærstu og mikilvægustu leiki íslenskrar knattspyrnu til þessa en eftir fyrri leikinn hefur eiginlega alveg gleymst að minnast á að úrslitin séu einnig einhver þau stærstu og bestu sem landsliðið hefur náð. Sigrar gegn Austur Þýskalandi 1975, Wales 1984, Spánverjum 1991, Tékkum 2001, Ítölum 2004 og jafntefli við Wales 1981, Þýskaland 2003 og heimsmeistara Frakka árið 1998 hafa oft verið nefnd sem þau úrslit sem staðið hafa upp úr hjá liðinu í gegnum tíðina. Þetta jafntefli við Króatíu má einnig tvímælalaust setja í sama flokk og ekki síst með mikilvægi hans sem úrslitaleiks í huga. Síðari leikurinn á þriðjudaginn verður mikilvægasti leikur Íslands frá upphafi og vonandi verða úrslit hans einnig þau stærstu í knattspyrnusögu Íslands.

ÁFRAM ÍSLAND!

42. VEÐURBLABLA...

Nú styttist heldur betur í stærstu leiki íslenskrar knattspyrnusögu og almenningur skiptist annars vegar í pirring yfir meintu miðasölusamsæri KSÍ (reyndar fullkomlega réttlætanlega) og hins vegar í djúpstæðar vangaveltur um veður- og vallaraðstæður á Laugardalsvelli þann 15. nóvember næstkomandi. Við Tumi höfum ákveðið að láta KSÍ mafíuna ekki skemma fyrir okkur stemmninguna í kringum leikinn og því ætlum við að skella okkur í veðrið að þessu sinni.

 

Fjölmiðlar voru augljóslega búnir að vera að bíða eftir fyrstu spám, frá þeim norsku veðurvefum sem mest er mark takandi á hér á landi, því strax snemma í síðustu viku voru komnar vangaveltur um stórhríð og Íslandsmet í frosthörkum á leikdag. DV greindi frá því í fyrirsögn að leikurinn væri í uppnámi og fengu jafnvel alvöru veðurfræðing til að rýna í óljósar gervitunglaspár og segja frá því versta sem í boði væri. Notuð voru framandi orð eins og "snjóstormur" og hótanir um 10 stiga frost áttu að vera vísbending um að ísöld hæfist á leikdag. Þetta var að morgni 5. nóvember og því enn heilir tíu dagar í leikinn! Svartsýni Íslendinga er greinilega engum takmörkum sett.

Í dag er hins vegar kominn mánudagur og því aðeins fjórir dagar til stefnu. Það er búið að breiða risastóran tjalddúk yfir Laugardalsvöllinn en dúkurinn var sóttur alla leið til útlanda og með honum fylgdu fjórir starfsmenn sem skiptast á vöktum við að blása heitu lofti undir hann. Þetta á allt saman að vera alveg ægilega fínt og framandi og ekki minnkaði metnaðurinn við það að umsjónarmenn vallarins vítamínbættu grasið og báru við járnskorti. Dúkurinn byrjaði reyndar að blakta eitthvað í rokinu um helgina en hann fór ekki langt. Þökk sé vakthafandi blástursmönnum. Og snefilefnin gerðu Laugardalsvöllinn fagurgrænan um íslenskan hávetur.

Veðurspár eru heldur að skýrast og í augnablikinu má gera ráð fyrir frekar eðlilegu vetrarveðri á leikdag á milli lægða en það hljóðar eitthvað á þá leið að reiknað er með vestan éljagangi, með hita í kringum frostmark. Ekkert sem ætti að koma á óvart þar miðað við árstíma.

En til gamans er ekki svo vitlaust að rýna í lokin aðeins í veður í Reykjavík þann 15. nóvember á undanförnum árum. Myndin hér fyrir neðan er til dæmis frá 15. nóvember árið 2004 og er tekin á Gróttuvellinum á Seltjarnarnesi. Guttarnir þarna virðast ekki vera í miklum erfiðleikum með að spila fótbolta í smá snjó en líklega gerir FIFA aðeins meiri kröfur um vallaraðstæður á föstudaginn.
 

ÁFRAM ÍSLAND!

41. SPEKINGAR SPÁ Í ENSKA BOLTANN

Enn eina helgina draga sérfræðingar Boltabulls fram spariheilasellurnar og leggja hausinn í bleyti fyrir leiki umferðarinnar. Líkt og venjulega eru 6 áhugaverðustu leikirnir dregnir fram í sviðsljósið en reyndar verður fyrirkomulagið með eilítið öðruvísi sniði að þessu sinni þar sem tveir aukaleikir verða hafðir með til gamans. Þetta eru að sjálfsögðu umspilsleikirnir tveir, fyrir HM 2014, þar sem Ísland og Króatía leiða saman bykkjur sínar í kringum þarnæstu helgi en þá helgi verður einnig frí hjá ensku Úrvalsdeildarliðunum. Þessir tveir leikir gefa að sjálfsögðu stig líkt og aðrir leikir Boltabulls keppninnar. Verðlaunin, fyrir að spá nákvæmlega fyrir um rétt úrslit í umspilsleikjunum, eru sko ekkert slor því að sigurvegarinn hlýtur að launum tvo miða á fyrri leikinn. Það er því til mikils að vinna.

Annars er Tumi enn efstur eftir leiki síðustu umferðar og hefur nú heil 70 stig, Helgi hefur 57 og Garðar 54.

Leikir næstu umferðar eru eftirfarandi;

CHELSEA - WBA
Tumi: 3-0
Garðar: 3-1 Edrú er kominn í gang hjá Chelsea og skorar þrennu.
Helgi: 3-1 Held að Chelsea verði varla í vandræðum með WBA, Oscar, Mata og Terry með mörkin.

SOUTHAMPTON - HULL
Tumi: 2-1
Garðar: 1-0 Heimasigur hjá South sem hafa verið að standa sig vel. Er nokkuð viss um að David Armstrong skorar.
Helgi: 2-1 Heimasigur þar sem Lambert skorar bæði.

LIVERPOOL - FULHAM
Tumi: 2-0
Garðar: 3-1 Fúlmennin vinna bara ekki með þessa kraga! Ekki einu sinni Liverpul.
Helgi: 4-0 SAS

TOTTENHAM - NEWCASTLE
Tumi: 2-1
Garðar: 2-0 Og enn skorar Soldado.
Helgi: 1-0 Sigurmarkið úr vafasömu víti síðla leiks.

SUNDERLAND - MAN CITY
Tumi: 0-5
Garðar: 0-4 Nenni ekki þessu Sunderlandi.
Helgi: 1-5 Miðað við að city hefur skorað tólf mörk í síðustu tveimur leikjum, þá fer þessi leikur svona, Negreto (2), Aguero (2) og Toure með mörkin.

MAN UTD - ARSENAL
Tumi: 0-2
Garðar: 1-1 Getur ekki endað öðruvísi. Young skorar örugglega með dýfu...
Helgi: 1-1 Jafntefli hlýtur að vera týpiskt, Ramsey og van Persie.

ÍSLAND - KRÓATÍA
Tumi: 1-1
Garðar: 1-2 Eiður með okkar mark en Króatarnir of sterkir.
Helgi: 1-1 Kolbeinn með íslenska markið snemma leiks...

KRÓATÍA - ÍSLAND
Tumi: 2-0
Garðar: 3-1 Heilsan er auðvitað fyrir öllu.
Helgi: 3-0 ...og þar með var draumurinn búinn.

 

40. FYRSTA BRESKA LIÐIÐ TIL AÐ VINNA EVRÓPUTITIL

Árið 1954 var Evrópska knattspyrnusambandið (UEFA) stofnað og strax haustið eftir var Evrópukeppni meistaraliða sett á laggirnar en hugmyndin að þeirri keppni var sú að meistaralið hvers lands í Evrópu kepptu sín á milli ár hvert. Þessi keppni er í dag kunn sem sjálf Meistaradeildin eins og allir vita. Sama ár fór einnig af stað keppni sem nefndist á íslensku Borgarkeppni Evrópu (Inter-Cities Fairs Cup) en árið 1971 var nafninu á henni breytt í Evrópukeppni félagsliða. Árið 1960 hófst hins vegar Evrópukeppni bikarhafa og lengi vel voru þessar þrjár keppnir í gangi í Evrópu en árið 1999 voru þær tvær síðast töldu sameinaðar í eina og sú keppni er í dag þekkt sem Evrópudeildin. Fyrstu árin einokuðu spænsk, ítölsk og portúgölsk lið þessar þrjár keppnir og var það helst Real Madrid sem var yfirburðarlið í Evrópu á þessum árum.

 

Tottenham Hotspur varð fyrsta breska liðið til að vinna einhverja af þessum þremur Evrópukeppnum sem voru í gangi en það gerðist þó ekki fyrr en árið 1963. Þá unnu þeir Evrópukeppni bikarhafa en sú keppni var þá haldin í þriðja sinn. West Ham sigraði síðan sömu keppni árið 1965 og ensku liðin voru þarna smán saman að koma sér fyrir sem sigurvegarar í Evrópu. Það var hins vegar ekki fyrr en Glasgow Celtic vann Evrópukeppni meistaraliða árið 1967 sem breskt lið vann fyrst stóru keppnina og árið eftir sigraði Man Utd sömu keppni eins og frægt er.

En það var sem sagt Tottenham sem reið á vaðið. Liðið sat hjá í fyrstu umferð keppninnar en síðan var komið að því að slá Glasgow Rangers út úr keppninni. Fyrst 5-2 á White Hart Lane með um 60.000 áhorfendum og síðan 3-2 á Ibrox að viðstöddum tæplega 80.000 manns. Í næstu umferð mætti Spurs tékkneska liðinu Slovan Bratislava og töpuðu fyrri leiknum úti 2-0 en slátruðu Tékkunum í London með sex mörkum gegn engu. Í undanúrslitum keppninnar mætti liðið OFK Beograd frá Júgóslavíu og hafði betur í báðum leikjunum, 2-1 á útivelli og svo 3-1 heima.

Úrslitaleikur Evrópukeppnar bikarhafa veturinn 1962-3 fór fram á Feyenoord Stadion í Rotterdam, miðvikudaginn 15. maí 1963 að viðstöddum um 50.000 áhorfendum, á milli Tottenham Hotspur og Atletico Madrid. Madridar liðið hafði rústað Fiorentina í úrslitaleik árið áður og þóttu ekki óáræðilegir andstæðingar. En spænska liðið var ekki mikil fyrirstaða fyrir Spurs í þessum leik. Það voru ekki nema kortér búið af leiknum þegar Jimmy Greaves var búinn að skora fyrir Tottenham eftir hraða sókn upp hægri kantinn.

 

John White bætti við öðru marki á 35. mínútu en White þessi var skoskur landsliðsmaður sem hlaut frekar dapurleg örlög. Sumarið 1964 varð hann fyrir eldingu á golfvelli í London og lést af völdum hennar aðeins 27 ára að aldri.

Staðan í leikhléi var 2-0 Spurs í vil en snemma í seinni hálfleiknum minnkaði spænski landsliðsmaðurinn Enrique Collar muninn úr vítaspyrnu og allt í einu var leikurinn opinn upp á gátt. Tuttugu mínútum seinna skoraði síðan Terry Dyson með skoti utan af kanti sem markmaður spænska liðsins missti ansi klaufalega yfir sig. Tíu mínútum fyrir leikslok skoraði Greaves aftur og staðan því orðin 4-1 en Dyson innsiglaði sigurinn með glæsilegu marki fimm mínútum seinna. Lokatölur urðu því 5-1 fyrir Spurs og félagið varð því, eins og áður segir, fyrsta breska liðið til að sigra í Evrópukeppni. 

Fyrirliðinn og goðsögnin Danny Blanchflower tók við bikarnum í leikslok og enn ein skrautfjöðrin bættist í titlasafn Tottenham á þessum árum en liðið hafði einnig unnið deildina og Bikarinn árin á undan.

Og auðvitað var líka tekinn sigurhringur með bikarinn eins og venjan er.

Hér er svo hægt að sjá myndband með helstu atriðum úr úrslitaleik Evrópukeppni bikarhafa árið 1963 á milli Tottenham Hotspur og Atletico Madrid.